කාටවත් කිසිම වරදක් නොකර ඇයි අපිට මඩ ගහන්නෙ
ටී.වී දෙරණ නාළිකාව කලා ක්ෂේත්‍රයට හඳුන්වලා දුන්න නිවුන් නිළියන් දෙදෙනෙක් තමයි අනුෂ්කි ප්‍රේමචන්ද්‍ර සහ කනුෂ්කි ප්‍රේමචන්ද්‍ර කියන්නෙ. විවිධ සිද්ධීන් සම්බන්ධව මේ දවස්වල සමාජ මාධ්‍යවල අනූ කනූ ගැන කතාබහට ලක්වෙලා තියනවා. ඉතින් ඒ කටකතා ගැන ඇත්ත වගේම අක්කයි නංගිගෙයි අලුත් විස්තරත් දැනගන්න කනුෂ්කි එක්ක අපි කතා කරමු.
කනූට නිකිනි කුසුම් නිසා මේ තාක් කරපු නැති දේවලුත් කරන්න වෙලා කියලා ආරංචියි ?
ඔව් මේ දවස්වල ටී. වී දෙරණ නාළිකාවෙ විකාශයවෙන නිකිනි කුසුම් ටෙලිනාට්‍යය එක්ක තමයි වැඩිපුර කාලය ගතවෙන්නෙ. ඉතින් නිකිනි කුසුම් නිසා මට බැට්මින්ටන් ක්‍රීඩිකාවක් වෙන්නත් වුණා. ඇත්තටම වෙනස් විදිහෙ අත්දැකීමක් ඒක. ප්‍රේක්ෂකයන්ගෙනුත් හොඳ ප්‍රතිචාර ලැබුණා. ඉස්සරහට ප්‍රේක්ෂකයො පුදුම වෙන තවත් දේවල් නිකිනි කුසුම් ටෙලිනාට්‍යයෙන් බලන්න පුළුවන්.
රංගනයට ආවා කියලා නර්තනය අතහැරලා නැහැ. . .
රංගනය නිසා තමයි අපි ගොඩක් දෙනා අතර ජනප්‍රිය වුණේ. හැබැයි නර්තනයට අක්කටයි මටයි දෙන්නටම හොඳ හැකියාවක් තියන නිසා රංගනය එක්ක නර්තන කටයුතු කරගෙන යනවා. ජාත්‍යන්තර නර්තන ශෛලීන් උදාහරණයට අරගෙන වෙනස් විදිහෙ නර්තනයන් තමයි අක්කයි මායි නිතරම කරන්නෙ. හොඳ තත්ත්වයේ නර්තනයන් ඉදිරිපත්කරන නිසා යූටියුබ් ඇතුළු සමාජ මාධ්‍යවල රසික රසිකාවියන්ගෙන් හොඳ ප්‍රතිචාර අපිට ලැබෙනවා
අනූ කනූ කියන්නෙ ටික්ටොක් නිළියො දෙන්නෙක්ද ?
නැහැ. අපි දෙන්නා ටෙලිනාට්‍යය නිළියො දෙන්නෙක් විදිහට තමයි ඉස්සෙල්ලාම කලා ක්ෂේත්‍රයට ආවේ. අපි වටා රසිකයො එකතු වෙද්දි ටික්ටොක් සහ අනිත් සමාජ මාධ්‍ය ගිණුම් සැකසුවා. ටිකෙන් ටික සමාජ මාධ්‍ය තුළින් එකතුවෙන පිරිස වැඩි වෙද්දි අපි හිතුවා වෙළෙඳ ප්‍රවර්ධනය වගේ දේවල් සමාජ මාධ්‍යවලින් කරන්න. අද වෙද්දි රංගනය සහ නර්තනයටත් වැඩිය ලොකු ආදායමක් සමාජ මාධ්‍යවලින් අපි උපයනවා.
සමාජ මාධ්‍යවලින් නිතරම මඩ පහරවලුත් වදිනවා නේද ?
ඔව් සමහරු පේජ් ජනප්‍රිය කරගන්න අපේ පොටෝ ව්‍යාජ විදිහට හදලා බොරු සිද්ධි එක්ක සමාජ මාධ්‍යවල ප්‍රසිද්ධ කරලා මඩ ගහන අවස්ථා තියනවා. ඉතින් ඒ දේවල් සම්පූර්ණයෙන් බොරු නිසා අපි ඒවට ප්‍රතිචාර දක්වන්නෙ නැහැ. ක්ෂේත්‍රයේ ආපු මුල් කාලෙ නම් ගොඩක් දුක හිතුණා කාටවත් කිසිම වරදක් නොකර ඇයි අපිට මඩ ගහන්නෙ කියලා. ප්‍රවීණ නළු නිළියො තමයි අපේ හිත හැදුවේ මඩ කියන්නෙ සාමාන්‍ය දේවල් කියලා. ඉතින් දැන් අපි මඩවලට ශක්තිමත්ව මුහුණ දෙනවා. කොච්චර මඩ ගැහුවත් ඒ දේවල්වලට සැලෙන්නෙ නැතුව අපි දිගටම අපේ ගමන යනවා. ඒ වගේම සමහරු අපිව විවේචනය කරනවා වගේම උපදෙස් දෙන අවස්ථාත් තියනවා. අපේ හදාගන්න අඩුපාඩු මොනවහරි තියනවා නම් අපි ඒ උපදෙස් විවේචන බාර අරගෙන ඒ දේවල් නිවැරැදි කරගන්න වගබලා ගන්නවා.
අනූ කනූ කියන්නෙ මොනවගේ දෙන්නෙක්ද ?
අනූ කනූ කියන්නෙ නිතරම සතුටින් ඉන්න හරි ආදරණීය කෙල්ලො දෙන්නෙක්.
දෙන්නා වෙනස් වෙන්නෙ මොනවයින්ද ?
අක්කි මටත් වැඩිය ගොඩක් හොඳ කෙනෙක්. එයා හැමෝම එක්ක කතා කරලා සුහදශීලීව ඉන්නවා. ඒ නිසා අක්කි වැඩිය හොයලා බලන්නෙ නැතුව ඉක්මනට මිනිස්සු විශ්වාස කරනවා. ඉතින් ඉක්මන් විශ්වාසය නිසා ප්‍රශ්න ඇතිවුණ අවස්ථාත් තියනවා. හැබැයි මම අක්කිට කවදාවත් බනින්නෙ නැහැ එයා හොඳ කෙනෙක් නිසා. මම නම් අක්කි තරම් සමාජශීලි නැහැ. නිශ්ශබ්දව පාඩුවේ මගේ වැඩටික කරගෙන ඉන්නයි මම කැමති. ගොඩක් වෙලාවට නිකිනි කුසුම් ටෙලිනාට්‍යයේ මම රඟපාන සකුනිගේ චරිතයේ ආකල්ප ගතිගුණම තමයි මට තියෙන්නෙ.
ක්ෂේත්‍රයේ අනිත් නිළියන් අතර තියන තරගය අක්කයි නංගියි අතර නැද්ද ?
නිවුන්නු නිසා පොඩිකාලෙ ඉඳලා අපි හැමදෙයක්ම කළේ එකට. හැමවෙලාවේම අනිත් කෙනා අභිභවා දිනන්න නෙමෙයි දෙන්නම එකට දිනන්න තමයි නිතරම උත්සාහ කරන්නෙ. අපිට අපි දෙන්නා අතර වගේම අනිත් නළු නිළියො එක්කත් කිසිම තරගයක් නැහැ. අනූ කනූ එහෙමත් නැත්තන් අක්කයි නංගියි විදිහට දෙයක් හරි විදිහට කරලා සාර්ථකත්වයක් ලබන්න තමයි අපි දෙන්නට ඕන.
කලා ක්ෂේත්‍රයේ ආපු ගමන ගැන ආපහු හැරිලා බැලුවොත් ?
අපේ පරම්පරාවෙන්ම කලාවට සම්බන්ධවෙලා වැඩ කරන්නෙ අපි දෙන්නා විතරයි. ඉතින් අපි මහන්සිවෙලා ක්ෂේත්‍රයේ යම්තාක් දුරකට අපේ පැවැත්ම හදාගෙන තියනවා. ඒ ගැන නිහතමානී සතුටක් තියනවා. ඉතින් මේ තාක් ලැබුණ අත්දැකීමුත් ප්‍රයෝජනයට අරගෙන තව මහන්සිවෙලා ක්ෂේත්‍රයේ ඉදිරියටම යන්න අපි බලාපොරොත්තු වෙනවා.
පවුලෙ අයගෙන් ලැබෙන සහයෝගය කොහොමද ?
අක්කටයි මටයි අවුරුදු එකහාමාරක් වෙද්දි තමයි අපේ තාත්තා නැති වුණේ. අපි දෙන්නට වැඩිමල් තව අක්කලා හතරදෙනෙක් ඉන්නවා. ඉතින් අපි හයදෙනාවම අම්මා තමයි දුක් මහන්සිවෙලා කන්න බොන්න දීලා උගන්නලා හැදුවේ. අද වෙද්දි අනිත් අක්කලා හතර දෙනත් හොඳ රැකියා කරනවා. ඒ හැමෝම අපේ කලා ජීවිතයට පුදුම සහයෝගයක් දෙනවා. නිර්මාණයක් ලැබුණහම ඒක සාර්ථක විදිහට කරන්න අපිට අක්කලා නිතරම උපදෙස් දෙනවා. ඒ වගේම ඇඟ පේන නොගැළපෙන ඇඳුම් අඳිනවා නම් ඒ දේවල් වෙනස් කරගන්න අම්මයි, අක්කලා හතරදෙනයි අපිට උපදෙස් දෙනවා.
ඇඟ ලස්සනට තියාගෙන ඉන්නෙ කොහොමද ?
නටන නිසා ඇඟ ලස්සනට හැඩ වෙලා තියනවා. ඒ ඇරුණහම නම් ලස්සන වෙන්න කියලා විශේෂ දෙයක් කරන්නෙ නැහැ. අපිට ස්වභාවිකව ලැබුණ රූපය හොඳදට පවත්වගෙන යන්න තමයි නිතර උත්සාහ කරන්නෙ.
විලාසිතා කරන්න කැමැති මොන විදිහටද ?
නිවුන්නු නිසා අපි දෙන්නම එකම විදිහෙ ඇඳුම් විලසිතා කරන්නෙ. ඉතින් වෙනස් විදිහෙ ලස්සන පාට ඇඳුම්, වෙනස් විදිහෙ අලුත් ආභරණ වගේ දේවල් තමයි අපි නිතර පාවිච්චි කරන්නෙ.
එකම විදිහෙ ඇඳුම්වලට දෙන්නම කැමැතියි වගේම එක පිරිමි ළමයෙක්ට හිතගිය වෙලාවල් තියනවද ?
ආදරය සම්බන්ධයෙන් නම් අපි දෙන්නගෙ අදහස් එකිනෙකට වෙනස්. ඒ නිසා දෙන්නටම තාම එක පිරිමි ළමයෙක්ට හිත ගිහින් නැහැ.
මේ වෙද්දි ආදරවන්තියන්ද ?
ආදරය ගැන හිතන්න අපි තාම පුංචියි. මේ වෙද්දි වෘත්තීය ජීවිතයට තමයි අපි පූර්ණ අවධානය දීලා තියෙන්නෙ. වෘත්තීය ජීවිතයත් තව සාර්ථක කරගෙන වයසිනුත් තව ටිකක් මුහුපුරා ගිහින් ආදරය ගැන හිතනවා. ආදරයක් හම්බ වුණ දාට ඒ ගැන ඉස්සෙල්ලාම පිනිපලසට කියන්නම්.
උපුටාගැනීම: අරුණ වෙබ්පිටුව
