වත්මන් රජය යන්නෙ රනිල්ගෙ අඩිපාරේ – සජිත්
ජනතා හිතවාදී නව අයි එම් එෆ් වැඩපිළිවෙළකට යන බව පැවසූ වත්මන් රජය ජනවරම විසිකර රනිල් වික්‍රමසිංහගේ අඩිපාරේ යමින් සිටින බව සමගි ජන බලවේගයේ නායක විපක්ෂ නායක සජිත් ප්‍රේමදාස මහතා කොළඹදී පැවසීය.
ජනවරම පැත්තකට විසි කර අයි එම් එෆ් කියන පදයට නටන රජයේ වැඩපිළිවෙල හේතුවෙන් රටටත් ජනතාවටත් ගොඩඒමක් නොමැති බවත් විපක්ෂනායකවරයා සඳහන් කළේය.
ජනතාව දිනා ගැනීමට කියූ දේවල් අමතක වී වත්මන් රජය නිර්වින්දනය වී ඇති බවත් කොළඹ දී මාධ්‍ය වෙත අදහස් දක්වමින් ඔහු පැවසීය.
ආචාර්ය හර්ෂ ද සිල්වාත් සමගි ජන බලවේගයත් කියන්නේ අයි එම් එෆ් රාමුව තුළ වැඩකරනවා සේම ජනතාවට පොරොන්දු වූ සහන ලබා දිය යුතු බවත් ප්‍රේමදාස මහතා කීවේය.
6% සිට 36% දක්වා වන බදු සූත්‍රය වෙනස් කර එය 1-24% දක්වා පහත දමන බවට පොරොන්දු වුවත් වත්මන් රජය අයි එම් එෆ් පදයට නටන බවත් ඔහු පැවසීය.
ආදායම වැඩි කරන්නට ඇති එකම ක්‍රමය බදු වැඩි කිරීම පමණක් නොව බදු දැලට හසු නොවන අය එයට ඇතුළත් කර ගැනීම බදු එකතු කිරීම කාර්යක්ෂම කිරිම ඩිජිටල් කරණය කිරීම කල හැකි බවත් විපක්ෂනායකවරයා සඳහන් කළේය.
විදුලි බිල අඩු තෙල් මිල විශාල වශයෙන් අඩු කරන බව පැවසුවත් වත්මන් රජය මැතිවරණ වේදිකාවේ පැවසූ දේවල් නොකර සිටින බවත් ප්‍රේමදාස මහතා පැවසීය.
රජය නව අයවැයක් ඉදිරිපත් නොකිරීමෙන් ඉදිරිය ගැන සිතා ගත හැකි බවත් පළාත් පළාන මැතිවරණයට තරග කිරීම හැර වත්මන් රජය පොරොන්දු ක්‍රියාත්මක කිරීමට සැලසුම් පවා සකස් කර නොමැති බවත් ඔහු සඳහන් කළේය.
පක්ෂයේ ඉදිරි ගමන ගැන දිස්ත්‍රික් මට්ටමින් සාකච්ඡා කරන බවත් ජාතික ලැයිස්තුව ගැන ඉදිරියේ දී තීන්දු තීරණ ගන්නා බවත් පක්ෂයේ තීන්දු තීරණ ගන්නේ වෙන අයට ඕනෑ විදිහට නොව පක්ෂයට අනුව බවත් සජිත් ප්‍රේමදාස මහතා තවදුරටත් පැවසීය.
උපුටාගැනීම: ලංකාදීප
