වීඩියෝ විකිනූ මවට අමතක නොවෙන පාඩමක්
මුලතිව් පුදුකුඩියිරිප්පු පොලිසියෙන් ඇසුණු අනුවේදනීය කතාවක්
අත්අඩංගුවට ගත් සැකකාරිය රිමාන්ඩ්
මවක් තම 13 හැවිරිදි දියණියගේ නිරුවත වීඩියෝකර සලෙළුන්ට විකුණලා
මවකට පියෙකුට තම දරුවන් දෙනෙත් වැනිය. තම දූ දරුවන් ලොකු මහත්කර හොඳ පුද්ගලයකු සේ සමාජයට දායාද කිරීම ඕනෑම මවකගේ පියකුගේ අභිප්‍රායයි. අරමුණයි.
එහෙම අම්මලා තාත්තලා අතර අමනුෂ්‍යයන් වැන්නෝද නැත්තේම නැත. තම 15 හැවිරිදි දියණිය අන්තර්ජාලය උපයෝගී කරගෙන සලෙළුන්ට අලෙවි කළ මවක ගැන මීට ටික කාලයකට පෙර ගල්කිස්ස ප්‍රදේශයෙන් වාර්තා වූ අතර එය මුළුමහත් ලාංකේය ජන සමාජයම සංවේදී කළ සිද්ධියක් වූ බව කාටත් අමතක නැත.
පොලිසිය ඒ පිළිබඳව සිදු කරන ලද දීර්ඝ විමර්ශනයේදී අනාවරණය වූයේ මවගේ අනුදැනුම මත අන්තර්ජාලයේ කාම වෙබ් අඩවියක් උපයෝගී කරගෙන සැළෙලුන්ට විකුණන ලද මේ ළාබාල දැරිය අපයෝජනය කරන ලද පුද්ගලයන් අතරේ සමාජයේ උසස් යැයි සම්මත විවිධ වෘත්තින්වල නිරත පුද්ගලයන් සැලකිය යුතු සංඛ්‍යාවක් ද සිට ඇති බවයි. එවැනි පුද්ගලයන් ගණනාවක් එම සිද්ධිය සම්බන්ධයෙන් විමර්ශනය කරන ලද පොලිස් කණ්ඩායම විසින් අත්අඩංගුවට ගෙන තිබුණි.
ඉන් අනතුරුවද එවැනි සිදුවීම් කීපයක් දිගින් දිගටම වාර්තා වූ අතර ආසන්නම සිද්ධිය වාර්තා වන්නේ ගාල්ල දිසාවේ යක්කලමුල්ල පොලිස් ස්ථානයෙනි.
එම පොලිස් බල ප්‍රදේශයේ වත්තක පදිංචිවී සිටි පියා නොමැති දරු පවුලක වයස අවුරුදු හතළිස් ගණනක් පමණ වන මව සිය අනියම් පෙම්වතා වන 26 හැවිරිදි තරුණයකුට තම 15 හැවිරිදි දියණිය බලහත්කාරයෙන් පාවා දීමයි.
මවගේ අනියම් පෙම්වතා අතින් අතවරයට ලක්වූ 15 හැවිරිදි යුවතිය ඒ බව අසල නිවෙසක පදිංචිකාරියකට පැවසීමේ ප්‍රතිඵලයක් වශයෙන් ඒ බව යක්කලමුල්ල පොලිසියට දැනගැනීමට ලැබීමෙන් අනතුරුව සැකකාර මව අත්අඩංගුවට ගත් අතර ඇගේ පෙම්වතා වන 26 හැවිරිදි පුද්ගලයා පලාගොස් තිබිණි. මව්පියන්ගේ ක්‍රියාකලාපය නිසා අසරණ වන අහිංසක දූ දරුවන් ගැන දිගින් දිගටම මෙවැනි තොරතුරු වාර්තා වෙද්දී උතුරු පළාතේ කිළිනොච්චිය දිසාවේ පුදුකුඩියිරිප්පු පොලිසියෙන්ද මෙවැනිම අනුවේදනීය සිදුවීමක් වාර්තා වන්නේ පසුගියදාය.
ඇය පුදුකුඩියිරිප්පු පොලිස් වසමේ නිවසක පදිංචි තරුණ මවකි. ඇගේ වයස අවුරුදු 35 කි. දරු දෙදෙනකුගේ මවකි. දරුවන් සමඟ කල් ගෙවන ඇය කලකට පෙර අනුවේදනීය අත්දැකීමකට මුහුණ දුන්නාය. ඒ ඇගේ සැමියා ඇය සහ දූ දරුවන් අතහැර වෙනතක් බලා ගැනීමය.
මේ සිද්ධියෙන් කම්පාවට පත් වූ තරුණ මව දරුවන් බලාකියාගෙන ජීවත් වූවාය. ඒ දුක් කරදර කම්කටොලු ගොඩක් මැදය. සැමියා අතහැර ගිය නිසා ඒ වන විටත් ඇය බොහෝ දුෂ්කරතාවලට මුහුණපා සිටියාය.
මේ අතර ඇය මත්පැන් පානයටද යොමු වූවාය. දරුවන් ඒ ගැන විරෝධය පළ කළත් ඇය ඒ පුරුද්ද නම් අත හැරියේ නැත. කාලය මෙසේ ගෙවී යද්දී මේ මව මුදල් උපයා ගැනීම සඳහා තවත් උපක්‍රමයක් යෙදුවාය. ඒ උපක්‍රමය අහස පොළොව නුහුලන එකකි. එහෙත් මත්පැන්වලින් සන්තර්පනය වී සිටින මේ මව එය වරදක් කොට නොසැලකුවාය. ඇගේ පාපතර ක්‍රියාව වූයේ වයස අවුරුදු 13ක් වන තම දියණියගේ නිරුවත වීඩියෝ කර එම දර්ශන සලෙළුන්ට අලෙවි කිරීමයි.
මේ සඳහා ඇය සිය නිවෙසට පැමිණෙන ලෙස විවිධ පුද්ගලයන්ට ආරාධනා කළාය. එසේ එන පුද්ගලයන්ට ඇය තම 13 හැවිරිදි දියණියගේ නිරුවත අඩංගු වීඩියෝ දර්ශන ජංගම දුරකතනයෙන් පෙන්වූවාය. ඒ සඳහා ඇය එම ගනුදෙනුකරුවන්ගෙන් මුදලක් ද අය කළාය.
පුදුකුඩියිරිප්පු පොලිස් බල ප්‍රදේශයේ පදිංචි තරුණ මවක් තම 13 හැවිරිදි දියණියගේ නිරුවත ජංගම දුරකතනයකින් වීඩියෝගත කර යම් පුද්ගලයන්ට රහසිගතව නිවෙසට කැඳවා එම දර්ශන ඔවුනට පෙන්වා මුදල් ලබා ගන්නා බවට පුදුකුඩියිරිප්පු පොලිස් ස්ථානයට රහසිගත තොරතුරක් ලැබෙන්නේ මේ අතරය.
මෙසේ ලැබුණු තොරතුර පිළිබඳව දීර්ඝ විමර්ශනයක නිරත පොලිස් නිලධාරීන් විසින් සොයා බලද්දී හෙළිවන්නේ එම තොරතුරු සත්‍ය බවය. ඉන් අනතුරුව සැකකාර මව අත්අඩංගුවට ගැනීම සඳහා විමර්ශන ආරම්භ කැරිණි.
සැකකාරිය අත්අඩංගුවට ගැනීම සඳහා පොලිස් කණ්ඩායමක් අදාළ නිවෙසට යන්නේ ඉන් අනතුරුවය. සැකකාරිය අත්අඩංගුවට ගත් පොලිස් නිලධරයෝ ඇගෙන් දීර්ඝ ලෙස ප්‍රශ්න කිරීමෙන් අනතුරුව දියණියගේ නිරුවත වීඩියෝ කළ ජංගම දුරකතනය ද අත්අඩංගුවට ගෙන එම වීඩියෝ දර්ශනද සොයා ගැනීමට සූදානම් වෙද්දී හෙළි වන්නේ අදාළ වීඩියෝ දර්ශන ජංගම දුරකතනයෙන් මකා දමා ඇති බවයි.
සැකකාරිය එලෙස සිය ජංගම දුරකතනයෙන් ලබාගත් දියණියගේ නිරුවත් වීඩියෝ දර්ශන සියල්ල මකා දමා තිබුණත් පොලිසිය අන්තර්ජාලය ඔස්සේ සිදු කරන ලද සූක්ෂ්ම විමර්ශනයකදී දියණිය සහ සැකකාරියගේද නිරුවත් දර්ශන අඩංගු වීඩියෝ දර්ශන ද සොයා ගැනීමට හැකි විය.
මේ සිද්ධිය සම්බන්ධයෙන් පොලිසිය සිදුකරන ලද සම්පූර්ණ විමර්ශනයේදී හෙළි වී ඇත්තේ මවගේ මේ ක්‍රියාවට දියණිය මුල සිටම විරෝධය පළකර ඇති බවයි. තමාගේ නිරුවත වීඩියෝ කරන මව ඒවා විවිධ පුද්ගලයන්ට පෙන්වා මුදල් ලබාගන්නා බව දියණිය ඒ වනවිටත් දැන සිට ඇති බවද පොලිස් විමර්ශනවලදී හෙළි විය.
දියණිය මවට මේ ගැන විරෝධය පළ කළද මව ඇයට තරවටු කරමින් මේ ක්‍රියාව දිගින් දිගටම සිදු කරගෙන ගොස් ඇති බවද අනාවරණය වන්නේ දැරියගෙන් කළ ප්‍රශ්න කිරීමේදීය. බීමතින් පසුවන මේ මව නිවසට කැඳවන පිරිමි අයට දියණියගේ නිරුවත් වීඩියෝ දර්ශන පෙන්වන අතරේ ඔවුන් සමඟ ලිංගිකව එක්වී ඇති බවද හෙළි වී ඇත. අත්අඩංගුවට ගත් සැකකාරිය අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කර ඇති අතර ඇයට සමාජ රෝග වැලඳී ඇත්දැයි සෙවීම සඳහා වෛද්‍ය පරීක්ෂණයකට ඉදිරිපත් කරන ලෙස ද අධිකරණය නියෝග කර ඇත. 13 හැවිරිදි දැරිය ඇතුළු දරු දෙදෙනා පරිවාස භාරයට පත්කැරිණි.
දීපාල් සමරසේකර
උපුටාගැනීම: සිළුමිණ
