මදුරු කොයිල් එකට පි ළිස්සී ද රු ගැ බ සමග මි යගිය තමිලිනීගේ අ භිරහස
යාපනය ප්‍රදේශයේ පසුගිය බෙපරවාරිය මැදදී කතාබහට ලක්වූ සිද්ධියක් වන්නේ චාවකච්චේරි ප්‍රාදේශීය ලේකම් කාර්යාලයේ සහකාර ප්‍රාදේශීය ලේකම්වරිය වූ තමිලිනීගේ අභිරහස්මය මරණයයි. ඇය සිය සිරුරට ගිනි තබාගෙන දැඩි තුවාල ලැබූ අතර, අවසානයේ රෝහලේදී ඇය සිය කුසේ සිටි මාස හයක දරු කළලය සමඟ මිය ගියාය. මෙම සිද්ධිය පිටුපස ඇති සැබෑ තත්ත්වය තවම අවිනිශ්චිතව පවතී.
තමිලිනී උපත ලැබුවේ 1990 ජූනි මස 11 වන දින යාපනයේ නීර්වේලී ප්‍රදේශයේදීය. ඇය පාසල් කාලයේ සිටම අධ්‍යාපනයට දැඩි උනන්දුවක් දැක්වූ අතර, ඇගේ රූප සෞන්දර්යය ද ඇය කෙරෙහි බොහෝ දෙනාගේ අවධානය යොමු කිරීමට හේතු විය. ඇගේ අධ්‍යාපන ගමන දිගටම සාර්ථක වූ අතර, අවසානයේදී යාපනය විශ්වවිද්‍යාලයේ උපාධිය හිමිකර ගැනීමට සමත් වූවාය.
උපාධිය ලබා ගැනීමෙන් පසු, තමිලිනී රාජ්‍ය පරිපාලන සේවා තරඟ විභාගයට පෙනී සිට, ලංකාවේ ඉතා සුළු පිරිසකට පමණක් හිමිවන රාජ්‍ය පරිපාලන සේවයේ තනතුරක් දිනා ගැනීමට සමත් වූවාය. විවිධ රාජ්‍ය ආයතනවල සේවය කළ ඇය, අවසානයේදී ප්‍රාදේශීය ලේකම් කාර්යාලයක මාණ්ඩලික ශ්‍රේණියේ තනතුරක් හිමිකර ගත්තාය. මෙම කාලය තුළදී ඇගේ ජීවිතය නව මාවතකට යොමු විය.
එම ප්‍රාදේශීය ලේකම් කාර්යාලයේදී තමිලිනී සදීසන් නම් ග්‍රාම නිලධාරියකු හමු වූවාය. සදීසන් තමිලිනී තරම් අධ්‍යාපනය ලැබූ අයෙකු නොවුවද, ඔහුගේ රූප සපුව සහ යහපත් ආර්ථික පසුබිම නිසා බොහෝ තරුණියන් අතර ඔහු ප්‍රසිද්ධියක් දිනා සිටියේය.
ආරම්භයේදී දෙදෙනා අතර පැවතියේ මිතුරු සම්බන්ධතාවයක් වුවද, වසරක් ගතවීමටත් පෙර එය ආදර සම්බන්ධයක් බවට පරිවර්තනය විය. තමිලිනී වෘත්තීය ජීවිතයේ දියුණුව ලබමින් යාපනයේ ප්‍රදේශයක සහකාර ප්‍රාදේශීය ලේකම්වරිය බවට පත් වූවාය. ඒ වන විට සදීසන් සමඟ පැවති ඇගේ ආදර සම්බන්ධතාවය තවදුරටත් ශක්තිමත් වී තිබුණි.
කෙසේ වෙතත්, දෙදෙනාගේ සම්බන්ධය තමිලිනීගේ පවුලට දැනගැනීමෙන් පසු, ඔවුන් එයට විරුද්ධත්වය පළ කළේ රැකියාවල පවතින තරාතිරම් හේතුවෙනි. මෙම කරුණ මත තමිලිනී සහ ඇගේ මව අතර නිතර ආරවුල් ඇති වුවද, අවසානයේදී තමිලිනී සිය මවට “හොඳ රස්සාවක් කරන කෙනෙකුට අපි කොහෙන් දෑවැද්දක් ලෑස්ති කරන්න ද අම්මා…? මෙයා සත පහක්වත් ඉල්ලන්නේ නෑනේ. ඒක නිසා මේක අපි කරමු…” යැයි පවසමින් කරුණු පැහැදිලි කළාය.
අවසානයේදී, තමිලිනී සහ සදීසන්ගේ විවාහය සිදු විය. වසර කිහිපයක් ගතවීමෙන් පසු, දෙදෙනාට දියණියක් උපත ලැබූ අතර, ඒ මීට වසර හතකට පෙරදීය. මෙම දරුවා ගැන සැමදෙනාම පැවසුවේ “එයත් තමිලිනී වගේමයි… ලස්සන හුරුබුහුටි කෙලි පොඩ්ඩ…” යනුවෙනි.
විවාහ ජීවිතයේ වෙනස්කම්
තමිලිනී චාවකච්චේරි ප්‍රාදේශීය ලේකම් කාර්යාලයේ සහකාර ප්‍රාදේශීය ලේකම්වරිය ලෙස පත් වූයේ මෑත කාලයේදීය. එවිට සදීසන් කෝපායී ප්‍රාදේශීය ලේකම් කාර්යාලයේ ග්‍රාම නිලධාරි ලෙස සේවය කළේය. මෙම කාලය වන විට තමිලිනී දෙවන දරුවා බලාපොරොත්තුවෙන් සිටි අතර, දරු ගැබට මාස තුනක් පමණ ගතවන විට සදීසන්ගේ හැසිරීමේ සැලකිය යුතු වෙනසක් දක්නට ලැබුණි.
පෙර තම නිවස ලෙස සැලකූ සදීසන්, කෙමෙන් නිවසට යාමේ ඒමේ අඩුවක් පෙන්නුම් කළේය. තමිලිනී ගැන සොයා බැලීම අඩු වූ අතර, ඇය කුමක් ඇසුවද ඔහු කෝපයට පත් විය. මුලදී ඉතා සන්සුන්ව සිටි සදීසන් දැන් හැසිරෙන්නේ යක්ෂයකු මෙන් බව තමිලිනී ඇගේ මවට පැවසුවාය.
සදීසන් වෙනත් කාන්තාවන් සමඟ සම්බන්ධතා පවත්වන බවට කටකථා පැතිර යන ලදී. සෑම අවස්ථාවකදීම තමිලිනී මේ ගැන ඔහුගෙන් විමසුව ද, ඇයට ලැබුණේ අපහාස සහ බැණවැදීම් පමණි.
අධ්‍යාත්මික සරණ සොයන තමිලිනී
මේ සියලු සිදුවීම් හේතුවෙන් තමිලිනී මානසිකව පීඩාවට පත් වූවාය. ඇය අධ්‍යාත්මික සරණ සොයමින් කාර්යාලය විවිධ ආගමික පිළිරූ සහ පින්තූරවලින් සරසා තිබුණි. තමිලිනී දිනකට දෙතුන් වරක් දෙවියන්ට මල් පූජා කිරීම, සුවඳ දුම් පූජා කිරීම සහ ආශීර්වාදය ඉල්ලා සිටීම වැනි ක්‍රියා කාර්යාලයේදී පමණක් නොව නිවසේදීද කළාය.
තමිලිනී තවත් අතින් චාවකච්චේරි ප්‍රාදේශීය ලේකම් කාර්යාලයට පැමිණෙන මහජනතාවට දැඩි සේවාවක් සැපයීමටද ආරම්භ කළාය. ඇය සියලු දෙනාටම කාරුණික වූ අතර, කිසිම අයෙකු අතහැර දැමීමට ඉඩ නොදුන්නාය. කාර්යාලයේ සියලු සේවකයන්ට ද ඇය කාරුණික මවක් මෙන් සැලකීය.
අවසාන සිදුවීම
තමිලිනීගේ ජීවිතයේ සැලකිය යුතු වෙනස්කම් දැක ගත හැකිව තිබියදී, ඇගේ කාර්යාලයේ පිරිස එක්වරම දැනගත්තේ “පොඩි මැඩම්ගේ ඇඟට ඊයේ රෑ ගිනි ඇවිළිලා… ගොඩාක් අමාරුයිලු…” යන පුදුම කරවන පුවතයි. සියලු දෙනා යාපනය ශික්ෂණ රෝහල වෙත ගියේ තමිලිනීගේ තත්ත්වය සොයා බැලීමටය. කෙතරම් ජනයා ඇය වටා සිටියද, තමිලිනීට ඔවුන් සමඟ කතා කිරීමට හෝ සිනාසීමට ශක්තියක් නොතිබුණි.
රෝග නිශ්චය තුණ්ඩුවේ තමිලිනී ගැබිනි කාන්තාවක් බව සඳහන් වී තිබූ නිසා, වෛද්‍යවරුන් උත්සාහ කළේ දරු ගැබ බේරා ගැනීමටය. කෙසේ වෙතත්, රෝහලේ දින හතරක් සටන් කිරීමෙන් පසු තමිලිනී සිය කුසේ සිටි මාස හයක දරු කළලය සමඟ මෙලොවින් සමුගත්තාය.
තමිලිනීගේ මරණයත් සමඟ විවිධ කටකථා පැතිර ගිය අතර, “මිනිහා තමිලිනීට ගිනි තියලා මරන්න ඇති…” වැනි ප්‍රකාශ බහුලව ඇසුණි. මීට හේතුවෙන් පොලීසිය මේ සම්බන්ධයෙන් පරීක්ෂණයක් ආරම්භ කළේය.
නිල ප්‍රකාශ
තමිලිනී රෝහලට ඇතුළත් කරන විට, ඇය සහ ඇගේ ස්වාමියා රෝහලේ බලධාරීන්ට පවසා ඇත්තේ “ලයිට් නැති දවසේ රෑ මෙයා ඉටිපන්දමක් පත්තු කළා. පස්සේ ඒකෙන් මදුරු දඟරයක් දුවගේ කාමරේට පත්තු කරලා තියන්න ගිය වේලාවේ තමයි ඇඳුමට ගිනි ඇවිලිලා තිබුණේ. අපි කිහිප දෙනෙක් ඉක්මනින් ගින්න නිවලා තමයි රෝහලට එක්කන් ආවේ…” යනුවෙනි.
එහෙත්, පරිසරයෙන් ලැබුණු බොහෝ සාක්ෂිවලට අනුව, තමිලිනී විසින්ම සිය සිරුරට ගිනි තබා ගත් බවට ආරංචි පැතිර ගියේය. කෙසේ වෙතත්, මෙය සිය ඇස් දෙකින් දුටු කිසිවෙකු නොමැති බැවින්, මරණයට හේතුව පැහැදිලිව සොයා ගැනීමට නොහැකි විය.
මරණ පරීක්ෂණ වාර්තාව
යාපනය ශීක්ෂණ රෝහලේ අධිකරණ වෛද්‍ය නිලධාරී ප්‍රේම්කුමාර් නාමශිවායම් විසින් පවත්වන ලද පශ්චාත් මරණ පරීක්ෂණයේ නිගමනය වූයේ, ඇය මාස හයක ගැබිනි කාන්තාවක් බවත්, මව සහ කුසේ වූ දරු කළලය යන දෙදෙනාම මිය ගොස් ඇත්තේ අධික ලෙස රශ්මියට පත් වීමෙන් ඇති වූ අභ්‍යන්තර රුධිර වහනයකින් හා දැඩි කම්පනයකින් බවයි.
ඉදිරිපත් වූ සාක්ෂි අනුව, යාපනය රෝහලේ හදිසි මරණ පරීක්ෂක එස්. ජෙයබාලන් මෙම මරණය සියදිවි හානි කර ගැනීමක් ලෙස තීරණය කොට ඇති අතර, ඇගේ මළසිරුර ආදාහනය නොකොට ගොඩ ගැනීමට අවශ්‍ය වුවහොත්, එය සිදු කිරීමට හැකිවන පරිදි වෙනම ස්ථානයක මිහිදන් කරන ලෙස නියෝග කොට තිබේ.
තමිලිනීගේ ජීවිතය අවසන් වූයේ ඉතා දුක්බර අයුරිනි. ඇය දැන් සිය කුසේ සිටි දරු කළලය සමඟම මිහිදන් කර ඇත. කෙසේ වෙතත්, ඇගේ මරණයට හේතුව සහ ඇය ගිනි තබා ගත්තේ කුමන හේතුවක් නිසාද යන්න, තමිලිනී සහ ඇගේ දරුවා සමඟම වැළලී ගොස් ඇත.
මෙම අවාසනාවන්ත සිදුවීම යාපනය ප්‍රදේශයේ බොහෝ දෙනාගේ හදවත් සොලවාලූ අතර, එහි සැබෑ සත්‍යය කවදාවත් එළිදරව් නොවනු ඇතැයි බොහෝ දෙනා විශ්වාස කරති.
gossip lanka news
