හදිසියේ මි යගිය KDU හෙද සිසුවිය
හදිසි අනතුරක් හේතුවෙන් අවාසනාවන්ත ලෙස ජීවිතක්ෂයට පත් වූ කොතලාවල ආරක්ෂක විශ්වවිද්‍යාලයේ සිසුවියකගේ වකුගඩු ඇතුළු ශරීර අවයව, තවත් රෝගියෙකුට බද්ධ කිරීම සඳහා පරිත්‍යාග කිරීමට ඇයගේ මව්පියන් විසින් උතුම් තීරණයක් ගෙන තිබේ.
මෙලෙස මියගොස් ඇත්තේ මහනුවර, හන්දෙස්ස ප්‍රදේශයේ පදිංචිව සිටි 24 හැවිරිදි එච්.එම්.එල්.ඩී ජයතිලක නමැති සිසුවියකි. ඇය කොතලාවල ආරක්ෂක විශ්වවිද්‍යාලයේ සම සෞඛ්‍ය විද්‍යා පීඨයේ හෙද සහ පවුල් සෞඛ්‍ය උපාධි පාඨමාලාවේ තෙවන වසරේ ඉගෙනුම ලබමින් සිට ඇත.
පසුගිය 05 වනදා විශ්වවිද්‍යාලයේ සිට නිවසට පැමිණ සිටි මෙම සිසුවිය නිවසේ නාන කාමරය තුළ ඇද වැටී ඇති අතර, පසුවදා (06) අලුයම 2.00 ට පමණ ඇයව ප්‍රතිකාර සඳහා මහනුවර ජාතික රෝහලට ඇතුළත් කර තිබිණි. රෝහලේ ස්නායු ශල්‍ය දැඩි සත්කාර ඒකකයේ ප්‍රතිකාර ලබමින් සිටියදී ඇය ඊයේ (08) ජීවිතක්ෂයට පත්විය.
මව්පියන්ගේ කැමැත්ත පරිදි බද්ධ කිරීම සඳහා අවශ්‍ය අවයව ඉවත් කර ගැනීමෙන් අනතුරුව ඇයගේ පශ්චාත් මරණ පරීක්ෂණය අද (09) මහනුවර ජාතික රෝහලේදී සිදු කෙරිණි. කෂේරුකාව තෙරපීමෙන් ඇති වූ සංකූලතා මත මස්තිෂ්කයට රුධිරය වහනය වීම මරණයට හේතුව බව එහිදී තහවුරු වී ඇත. ඉදිරිපත් වූ වෛද්‍ය වාර්තා සහ සාක්ෂි සලකා බැලූ මහනුවර ජාතික රෝහලේ හදිසි මරණ පරීක්ෂක චන්ද්‍රවංශ වරකාඋල්ල මහතා මෙය හදිසි මරණයක් බවට නිගමනය කළේය.
