ක්‍රීඩා ඇමතිගේ අලුත්ම ක්‍රියාකලාපය
ක්‍රීඩා අමාත්‍යංශය සහ ඊට අනුබද්ධ ආයතනය තුළ වන වංචා සහ දූෂණ කෙළින්ම අමාත්‍යවරයා වන තමන්ට පැමිණිළි කළ හැකි බවත් මෙතෙක් කර ඇති හොරකම්, වංචා සහ දූෂණ අමතක කළ නොහැකි බවත් තරුණ කටයුතු හා ක්‍රීඩා අමාත්‍ය සුනිල් කුමාර ගමගේ මහතා අද (28) පැවසීය.
සුගතදාස ජාතික ක්‍රීඩා සංකීර්ණ අධිකාරියේ නිරීක්ෂණයකට එක්වෙමින් අමාත්‍ය සුනිල් කුමාර ගමගේ මහතා අද එසේ පැවසීය.
දේශපාලනය, පක්ෂ බේද, මෙතෙක් සිදුවූ අඩුපාඩු අමතක කර වැඩ ආරම්භ කර මානව දයාව පිරි සමාජයක් ගොඩනැගීම වර්තමාන ආණ්ඩුවේ අරමුණ බවත් එම අරමුණ වෙනුවෙන් වංචාවෙන් සහ දූෂණයෙන් තොර රටක් බිහි කළ යුතු බවත් අමාත්‍යවරයා කීය.
ආයතන තුළ සිදුවෙන වංචා, දූෂණ කෙළින්ම ඇවිත් පැමිණිළි කිරීමට මීට පෙර නොහැකි වූයේ එවැනි පරිසරයක් නොමැති වූ නිසා බව කී සුනිල් කුමාර මහතා අමාත්‍යවරයාගේ සිට ඉහළ නිලධාරීන් කොතනක හෝ සම්බන්ධ වී සිටීම එයට හේතුව බව ද සඳහන් කළේය.
වර්තමාන ආණ්ඩුවේ එවැනි තත්වයක් නොමැති බවත් කිසිඳු බයක් නොමැතිව එක්වන ලෙස ඉල්ලා සිටින බවත් ඒ මහතා වැඩි දුරටත් සඳහන් කළේය.
සුගතදාස ජාතික ක්‍රීඩා සංකීර්ණ අධිකාරියේ මෙම අවස්ථාවට ක්‍රීඩා නියෝජ්‍ය අමාත්‍ය සුගත් තිලකරත්න සහ තරුණ කටයුතු නියෝජ්‍ය අමාත්‍ය එරංග ගුණසේකර යන මහත්වරු ද එක්ව සිටියහ.
