රථ වාහන ධාවනය ගැන රියදුරන්ට දැනුම්දීමක්
මධ්‍යම කඳුකරයේ හැටන් ආශ්‍රිත ප්‍රදේශයේ විටින් විට පවතින අධික මීදුම් තත්ත්වය නිසා මෙම ප්‍රදේශයන් තුළ විවිධ රථ වාහන අනතුරු ඇතිවීමේ අවදානමක් හටගෙන තිබෙනවා.
විශේෂයෙන් හැටන් – කොළඹ ප්‍රධාන මාර්ගයේ වටවල, කැරලයිනා, දියගල, කඩවල, ගිණිගත්හේන යන ප්‍රදේශවලත් හැටන් නුවරඑළිය මාර්ගයේ කොටගල, පතන දිඹුල, ලිදුල, රදැල්ල, නානුඔය යන ප්‍රදේශවලත් විටින් විට මාර්ගය නොපෙනී යන ආකාරයෙන් දැඩිව මීදුම පවතින බවයි සඳහන් වෙන්නේ.
මෙම තත්ත්වයන් පිළිබඳව දැඩි අවධානයක් යොමුකර, මෙම මාර්ගවල රථ වාහන ධාවනය කිරීමේදී තම රථ වාහනවල ඉදිරිපස ලාම්පු දල්වා ඉතාමත් කල්පනාකාරීව තම රථ වාහන ධාවනයට පියවර ගන්නා ලෙස එකී මාර්ගවල රථ වාහන ධාවනය කරනු ලබන සියලුම රියදුරන්ගෙන් පොලීසිය ඉල්ලා සිටිනවා.
